KATON GAYENG NGRESEPAKE

KATON GAYENG NGRESEPAKE

Kabeh wis ditata. Sing nata ibune. Anak-anake melu ngrewangi. Meh kabeh melu ngrewangi. Kajaba sing esih cilik lan durng bisa. Bapake esih uthek ngrampungake pagawean ngomah.

Sega lan lelawuhane wis cumawis kalebu sambel lan lalapan. Piring, sendok, garpu (prok), wijikan, lan serbet wis sumadhiya.

Segane putih, pulen, turkenul-kenul. Dhasar esih manget-manget. Lawuhe prasaja: jangan lodheh kacang, lembayung, cipir, tahu, tempe, lan gereh pethek, sambel trasi lalapane kol lan tomat. Uga ana sop, nanging mung cepakan kanggo Dhidhik sing cilik dhewe, lagi umur limang taun.

Wong saomah kabeh wis lungguh dhewe-dhewe, kepung ngopengi meja makan. Edhi lan Dhian pinuju dolan ing kono. Bocah loro kuwi ponakane Bapak lan Ibu Brata. Edhi lan Dhian diajak mangan bareng. Lunguhe ora padha kadohan lan ora padha kecedhaken karo meja makan. Banjur padha ndonga, uga dhewe-dhewe.

Bapak lan Ibu Brata luwih ndhisik njupuk sega. Nanging ora enggal mangan, njupuk lawuh bae durung. Nuli padha ngladeni Dhidhik. Ana sing njupukake sega, ana sing nawani gereh, ana sing ngangkatake sop.

Sawise Dhidhik wiwit mangan, nuli padha lagi bebarengan tumandang, njupuk sega lan lawuhe. Sanadyan wonge akeh, nanging ora semrawut. Anggone njupuk sarwa tamban, sareh genti-genten. Kala-kala lawuhe diangkat diubengake.

Endhang mangan nganggo sendhok lan garpu. Totok mung  nganggo sendhok. Nyendhok sega lawuh, banjur dilebokake cangkem. Sendhok diputer dhisik, kang dilebokake ing cangkem peranganing pucuk, dudu iring kiwa utawa tengening sendhok. Cangkem nuli mingkem. Pamamahe alon, ora kesusu, diematake. Ora keprungu kecap-kecap. Keprungu iya ora seru tur mung kala-kala bae.

Katon gayeng, ngresepake. Kala-kala diselingi crita. Yen arep omong, sega lawuh diulu dhisik, lambe diresiki, dadi ora nyemprot-nyemprot metu. Ana sing kapeksa mandhek ngrungokake, banjur sumambung mung saprelune. Yen manut tata krama dhek biyen, wayahe mangan mangkono iku ora kena guneman, kudu anteng, meneng. Yen manut tata krama saiki, kena bae guneman. Nanging kudu mnadheg dhisik. Kang dimamah wis diulu, cangkem lan lambe resik.

Kabeh padha nggatekake. Sing wis kentekan lawuh, dicedhaki lan diulungi lawuh. Sing meh entek kokohe, ditawani lan dicedhaki tandhukan. Mangkono sapiturute, mangan bareng gawe raket rukune kaluwarga.

Katrangan

1.      Uthek: obah nyambut gawe

2.      Pulen: empuk nenel ora akas

3.      Kenul-kenuk: empuk nenel

4.      Semrawut: pating srawut, ora tumata

5.      Tamban: alon kepenak

6.      Gayeng: nyenengake lan gumreget

7.      Kokohe: sega ing piring nalikane mangan.